Kur dikush kërkon "pastiçeri afër meje" ose "mekanik Fushë Kosovë", rezultati i parë që sheh shpesh s'është një website. Është harta, me tre biznese, yjet e tyre dhe një buton për t'u telefonuar. Ato kartela vijnë nga Google Business Profile (më parë Google My Business).
Profili është falas. S'ju duhet website për ta hapur, edhe pse të dyja punojnë më mirë bashkë. Ja si ta bëni siç duhet.
1. Krijimi dhe verifikimi
Hyni te business.google.com me llogarinë Google që do ta përdorni për biznesin (mirë është të mos jetë llogaria personale e një punonjësi që mund të largohet). Kërkoni emrin e biznesit; nëse ekziston tashmë një profil, mund ta kërkoni si tuajin.
Google kërkon verifikim, që të vërtetojë se biznesi është i juaji. Mënyrat ndryshojnë sipas vendit dhe llojit të biznesit: mund të jetë telefonatë, SMS, email, video e shkurtër ose kartolinë me postë. Ndiqni atë që ju ofrohet; pa verifikim, profili s'shfaqet siç duhet.
2. Kategoria: zgjedhja më e rëndësishme
Kategoria kryesore i tregon Google për çfarë kërkimesh jeni relevantë. Zgjidhni më specifiken që ju përshkruan: "Klinikë dentare" është më mirë se "Klinikë", "Restorant peshku" më mirë se "Restorant". Mund të shtoni edhe kategori dytësore, por vetëm ato që janë vërtet pjesë e punës suaj.
3. Emri, adresa, telefoni: njësoj kudo
Shkruani emrin e biznesit ashtu si është në realitet, pa shtuar fjalë kyçe ("Dentisti Durrës Më i Miri" mund ta pezullojë profilin). Adresa dhe numri duhet të jenë identikë me ato në website, Facebook, Instagram dhe kudo tjetër. Mospërputhjet e vogla e ngatërrojnë Google për atë se cili informacion është i saktë.
Nëse punoni te klienti (hidraulik, pastrim, fotograf) dhe s'keni zyrë ku vjen publiku, mund ta fshihni adresën dhe të vendosni zonat ku shërbeni.
4. Orari, përfshirë ditët e veçanta
Klienti që shkon te dera e mbyllur sepse Google tha "hapur" s'kthehet më. Përditësoni orarin për festat dhe pushimet. Google ju lejon të vendosni orar të veçantë për data specifike.
5. Fotot: të vërteta, jo stock
Hyrja nga jashtë (që ta njohin kur vijnë), brendësia, ekipi, produktet, puna e bërë. Foto të vërteta të bëra me telefon, me dritë të mirë, janë më bindëse se fotot e blera nga interneti. Shtoni të reja herë pas here. Nëse shitni produkte, udhëzuesi për fotot me telefon ndihmon edhe këtu.
6. Përshkrimi dhe shërbimet
Përshkrimi ka hapësirë për disa fjali. Shkruani çfarë bëni, për kë dhe ku, në gjuhë të thjeshtë. Shtoni shërbimet ose produktet një nga një, me çmim nëse e keni të qartë. Nëse keni klientë që flasin gjuhë të tjera, përmendni që e flisni atë gjuhë.
7. Vlerësimet: kërkojini dhe përgjigjuni
Vlerësimet janë ndoshta pjesa që ndikon më shumë te klienti. Shumica e klientëve të kënaqur s'lënë vlerësim sepse s'u kujtohet, jo sepse s'duan. Kërkojuani drejtpërdrejt, me linkun direkt që Google ju jep te profili ("Merr më shumë vlerësime"), menjëherë pasi keni mbaruar punën.
- Përgjigjuni çdo vlerësimi, edhe të mirëve, shkurt dhe me emër.
- Vlerësimit negativ përgjigjuni me qetësi, pa debat, me një zgjidhje. Klientët e ardhshëm lexojnë përgjigjen tuaj më shumë se ankesën.
- Mos blini dhe mos shkruani vlerësime të rreme. Google i heq dhe mund ta penalizojë profilin, dhe klientët i dallojnë më shpejt se sa duket.
8. Mbajeni gjallë
Profili ka postime (oferta, lajme, evente) dhe pyetje-përgjigje. Një postim në muaj dhe përgjigje e shpejtë te pyetjet tregojnë që biznesi është aktiv. Kontrolloni edhe sugjerimet e ndryshimeve që bëjnë të tjerët: kushdo mund t'i propozojë Google një ndryshim në profilin tuaj.
Profili dhe website-i punojnë bashkë
Profili sjell klikime; website-i i kthen në besim. Lidhni website-in te profili, dhe në website vendosni të njëjtin emër, adresë dhe telefon. Nëse doni të shkoni më tej me renditjen lokale, shihni shërbimin tonë të SEO-s.
Doni ndihmë me profilin ose me SEO lokale?
Ju ndihmojmë ta plotësoni profilin siç duhet dhe ta lidhni me website-in.
Na shkruani →