Historia që dëgjojmë më shpesh nga klientët e rinj nuk ka të bëjë me dizajnin. Është kjo: "Ma bëri dikush para disa vitesh, tani s'përgjigjet, dhe s'e di as ku është faqja, as kush e ka domain-in."
Asnjë nga këto s'është e pashmangshme. Mjafton të bëni pyetjet e duhura para se të paguani, dhe t'i keni përgjigjet me shkrim. Ja 12 prej tyre, në rendin që ka rëndësi.
Pronësia: pyetjet që s'duhen anashkaluar kurrë
- Domain-i regjistrohet në emrin tim apo në emrin tuaj? Domain-i (p.sh. biznesijuaj.com) është adresa juaj në internet. Duhet të jetë në emrin tuaj ose të biznesit tuaj, me qasje që e kontrolloni ju. Nëse regjistrohet në emrin e dikujt tjetër, në praktikë ai kontrollon adresën tuaj.
- Kush e zotëron faqen pas pagesës së plotë? Kodi, dizajni, tekstet, fotot. Kërkojeni të shkruar. Nëse një ditë doni të ndërroni ofrues, a mund ta merrni faqen me vete?
- A do të kem qasje si administrator? Edhe nëse s'planifikoni ta përdorni vetë, duhet ta keni. Pa të, çdo ndryshim varet nga një person.
Kostot: çfarë paguani tani dhe çfarë më vonë
- Çfarë përfshin saktësisht çmimi? Sa faqe, sa gjuhë, a përfshihen tekstet, fotot, SEO bazë, formulari, Google Analytics. Një çmim pa listë është vetëm një numër.
- Cilat janë kostot vjetore pas publikimit? Domain-i dhe hosting-u paguhen zakonisht çdo vit. Pyesni sa kushtojnë, kush i paguan dhe çfarë ndodh nëse s'paguhen.
- Si bëhet pagesa? Një ndarje e zakonshme është paradhënie në fillim dhe pjesa tjetër para publikimit. Kini kujdes me kërkesat për 100% përpara.
Procesi: si do të punojmë bashkë
- Sa raunde ndryshimesh përfshihen, dhe çfarë quhet ndryshim? "Ndryshime të pakufizuara" zakonisht do të thotë që askush s'e ka menduar. Një numër i qartë (p.sh. 2 raunde për dizajnin) është më i ndershëm.
- Çfarë duhet të përgatis unë, dhe deri kur? Logo, tekste, foto, informacion për shërbimet. Shumica e vonesave vijnë nga materialet që mungojnë, jo nga zhvilluesi.
- Sa zgjat, dhe çfarë e vonon? Një afat i arsyeshëm vjen me kushte: "3 javë nga dita që na dërgoni tekstet" është më e besueshme se "3 javë".
- Çfarë ndodh nëse s'më pëlqen dizajni? Disa ofrues kanë garanci, të tjerë jo. Është mirë ta dini para se të paguani paradhënien.
Pas publikimit: pjesa që harrohet
- Kush e mirëmban faqen, dhe sa kushton? Përditësime, backup, siguri. Nëse përgjigjja është "s'ka nevojë", kjo është shenjë e keqe për një faqe që do ta mbani vite. Më shumë te udhëzuesi për mirëmbajtjen.
- Sa shpejt përgjigjeni kur diçka prishet? Kërkoni një afat konkret, jo "menjëherë". Një afat realist që mbahet vlen më shumë se një premtim që s'mbahet.
Si t'i lexoni përgjigjet
S'ka përgjigje perfekte për çdo pyetje. Ajo që tregon më shumë është mënyra si përgjigjet ofruesi. Nëse përgjigjet qartë, me numra dhe me shkrim, ka shumë gjasa që të punojë po ashtu. Nëse çdo përgjigje është "mos u shqetëso, e rregullojmë", ka gjasa që problemet të dalin pikërisht atje ku s'u fol.
Këto pyetje mund t'ua bëni edhe neve. Ne preferojmë klientë që pyesin shumë në fillim, sepse kështu s'ka surpriza në fund.
Nëse po krahasoni oferta, edhe artikulli për zgjedhjen e agjencisë ju ndihmon të dalloni ofertat serioze nga ato që vetëm duken lirë.
Keni një ofertë dhe s'jeni të sigurt?
Na e dërgoni dhe ju themi çfarë mungon, edhe nëse në fund s'punoni me ne.
Na shkruani →