Mendoni herën e fundit që hapët një faqe në telefon dhe ekrani mbeti bosh. Sa sekonda pritët para se të ktheheshit prapa? Vizitorët tuaj bëjnë saktësisht të njëjtën gjë, dhe s'ju thonë pse s'ju shkruan.
Shpejtësia s'është vetëm çështje teknike. Ndikon te sa njerëz e shohin faqen deri në fund, sa ju kontaktojnë, dhe është një nga sinjalet që Google merr parasysh. Lajmi i mirë: s'ju duhet të jeni programues për ta kuptuar.
Tri numrat që mat Google
Google i quan Core Web Vitals. Emrat tingëllojnë teknikë, por secili mat diçka që e ndien çdo vizitor:
- LCP (Largest Contentful Paint): sa shpejt shfaqet pjesa kryesore. Zakonisht titulli ose fotoja e madhe. Google e quan të mirë kur ndodh brenda 2.5 sekondave.
- INP (Interaction to Next Paint): sa shpejt reagon faqja kur e prekni. Shtypni një buton dhe s'ndodh asgjë për një çast? Kjo është INP. I mirë: nën 200 milisekonda.
- CLS (Cumulative Layout Shift): sa "kërcen" faqja ndërsa hapet. Doni të shtypni një link, ngarkohet një foto sipër dhe shtypni diçka tjetër. I mirë: nën 0.1.
Google i vlerëson këto sipas përvojës së vizitorëve realë, në 75% të vizitave. Pra s'mjafton që faqja të jetë e shpejtë në kompjuterin tuaj në zyrë; duhet të jetë e shpejtë edhe në telefonin e klientit, me internetin e tij.
Si ta matni falas, në 2 minuta
- Hapni PageSpeed Insights (pagespeed.web.dev) dhe shkruani adresën e faqes suaj.
- Shikoni pjesën e sipërme, "Discover what your real users are experiencing". Ato janë të dhëna nga vizitorë realë, nëse faqja ka mjaftueshëm trafik.
- Pjesa poshtë, me pikët nga 0 në 100, është një test i simuluar në një telefon të ngadaltë. E dobishme për të gjetur problemet, por mos u frikësoni nga numri: s'është e njëjta gjë me përvojën reale.
Pikët e laboratorit (p.sh. 60 nga 100) dhe të dhënat reale shpesh ndryshojnë. Një faqe me shumë animacione mund të marrë pikë të ulëta në test dhe megjithatë të hapet shpejt për vizitorët realë. Vendimet merrini kryesisht nga të dhënat reale.
6 shkaqet më të shpeshta të një faqeje të ngadaltë
- Foto shumë të rënda. Një foto direkt nga telefoni ose aparati mund të jetë disa megabajt. Në web duhet të jetë shumë më e vogël, në formate si WebP ose AVIF, dhe në madhësinë që shfaqet.
- Shumë plugin-e ose skripte. Çdo shtesë (chat, statistika, slider, efekte) shton kod që telefoni duhet ta shkarkojë dhe ekzekutojë.
- Hosting i lirë dhe i mbingarkuar. Serveri përgjigjet ngadalë para se të nisë çdo gjë tjetër.
- Tema "për gjithçka". Disa tema WordPress ngarkojnë funksione që s'i përdorni kurrë.
- Fonte të shumta. Katër familje shkronjash, secila me pesë trashësi, janë shumë.
- Video që ngarkohet automatikisht në krye të faqes, sidomos në telefon.
Çfarë mund të bëni vetë sot
- Zvogëloni fotot para se t'i ngarkoni (ka mjete falas online për këtë).
- Çaktivizoni plugin-et që s'i përdorni më.
- Hiqni slider-in në krye nëse s'ka arsye të fortë. Një foto e mirë dhe një titull i qartë zakonisht punojnë më mirë.
- Kontrolloni faqen në telefonin tuaj me internet celular, jo me Wi-Fi të zyrës.
Kur duhet ndihmë
Nëse faqja mbetet e ngadaltë pasi keni bërë të sipërmet, problemi zakonisht është më thellë: te tema, hosting-u ose mënyra si është ndërtuar faqja. Ndonjëherë rregullohet me optimizim; ndonjëherë është një nga shenjat që faqes i duhet rindërtim.
Optimizimi i shpejtësisë është pjesë e paketave tona të website-it dhe e mirëmbajtjes mujore.
Doni të dini pse faqja juaj është e ngadaltë?
Na dërgoni linkun dhe ju themi tre shkaqet kryesore dhe çfarë kushton rregullimi.
Kontrollo shpejtësinë →